Light Nepal

ओली र प्रचण्ड नेपालमा नरहँदा माधव नेपालले हत्याए पार्टीको नेतृत्व, बेपत्ता भए झलनाथ र वामदेव

काठमाडौं, ५ असार । प्रधानमन्त्री केपी शर्मा ओली चीन भ्रमणमा र अध्यक्ष प्रचण्ड सिंगापुर जाँदा नेपाल कम्युनिस्ट पार्टीमा माधव कुमार नेपालले ठूलो जिम्मेवारी पाएका छन्। वरिष्ठ नेता झलनाथ खनाललाई उछिन्दै नेपालले कार्यबाहक अध्यक्षको जिम्मेवारी पाएका हुन्। ओली र प्रचण्डको अनुपस्थितीमा अब नेपालले नेकपाको कमाण्ड सम्हाल्नेछन्।
नेकपाका महासचिव विष्णु पौडेलका अनुसार नेकपाको कार्यवाहक अध्यक्ष बरिष्ठ नेता माधवकुमार नेपाल बनेका छन् । अर्का अध्यक्ष प्रचण्ड पनि नभएकाले पार्टीमा ओली र प्रचण्डपछि तेस्रो बरियतामा रहेका बरिष्ठ नेता नेपाललाई कार्यवाहक अध्यक्ष बनाइएको हो । प्रचण्ड पत्नी सीता दाहालको उपचारका सिलसिलामा सिंगापुरमा छन् ।

२०६४ सालको निर्वाचनमा पार्टीको पराजयपछि महासचिव पदबाट राजिनामा दिएका नेपालले त्यसपछि पार्टी प्रमुखको जिम्मेवारी सम्हालेको यो पहिलो हो । उनी १४ वर्ष नेकपा एमालेको नेतृत्व गरेपछि बरिष्ठ नेताको हैसियतमा थिए । यसबीचमा झलनाथ खनाल र केपी ओली अध्यक्ष भएका बेला कार्यवाहक जिम्मेवारी बामदेव गौतम र अशोक राईले पाउने गरेका थिए ।

ओलीले कार्यवाहक प्रधानमन्त्रीको जिम्मेवारी उपप्रधानमन्त्री तथा रक्षामन्त्री ईश्वर पोखरेललाई दिएका छन् । मन्त्रिपरिषदमा प्रधानमन्त्रीपछिको दोस्रो बरियतामा रहेका उपप्रधानमन्त्री पोखरेल यसअघि ओली भारत भ्रमणमा जाँदा पनि कार्यवाहक प्रधानमन्त्री थिए ।

महासचिव पौडेलका अनुसार नेकपा संसदीय दलको कार्यवाहक नेताको जिम्मेवारी उपनेता सुवास नेम्वाङलाई दिइएको छ । संयोग नै मान्नुपर्छ ओली हिँड्दा कार्यवाहक पाउने तीनैजना नेता तत्कालिन एमालेका परेका छन् ।

कार्यवाहक अध्यक्ष नेपालले दुवै अध्यक्ष नभएको बेला पार्टी सन्चालनको नेतृत्व गर्नेछन् भने कार्यवाहक प्रधानमन्त्रीले प्रधानमन्त्रीको अनुपस्थितमा सरकार सन्चालन गर्नेछन् । संसदीय दलका कार्यवाहक नेता नेम्वाङले संसदीय फाँटका गतिबिधिको नेतृत्व गर्नेछन् ।

प्रतिक्रिया दिनुहोस्