Light Nepal

विश्वकै धनी बेजोसले गरे २५ वर्ष लामो वैवाहिक जीवनलाई अन्त्य

काठमाडौ, २७ पुस । हालै विश्वकै सर्वाधिक धनी व्यक्ति बन्न सफल अमेजन कम्पनीका संस्थापक दम्पत्तिको सम्बन्ध विच्छेद भएको छ। संस्थापक जेफ बेजोस र उनकी श्रीमती मक्केन्जीले २५ वर्ष लामो वैवाहिक जीवनलाई अन्त्य गरेको घोषणा गरेका हुन्।

अमेजनको सिइओको ट्वीटर एकाउन्टबाट दुवै जनाले बुधबार संयुक्त वक्तव्य सार्वजनिक गर्दै वैवाहिक जीवन राजीखुशीले अन्त्य गरेको उल्लेख गरेका छन्। उनीहरूले आफूहरू श्रीमान् श्रीमतीका रूपमा नरहेपनि नजिकको साथीका रूपमा भने रहिरहने जानकारी पनि दिएका छन्।

‘लामो समयसम्मको प्रेमपूर्ण जीवनबाट हामी अब छुट्एिका छौं, हामीले सम्बन्ध विच्छेद गरेपनि साथीको रूपमा हामी रहिरहने छौं,’ वक्तव्यमा भनिएको छ। एक अर्काप्रति कृतज्ञता प्रकट गर्दै उनीहरुले लेखेका छन्, ‘हामीले सँगै बिताएको समय अत्यन्त सौभाग्यपूर्ण थियो, एक अर्कालाई पाएकोमा हामी भाग्यमानी हौं, हामी एक अर्काप्रति कृतज्ञता ज्ञापन गर्दछौं।’

उनीहरुले ‘अहिले सम्बन्ध विच्छेद हुने कुरा विवाह अगाडि नै थाहा पाएको भएपनि हामीले विवाह गर्ने थियौं’ भनेका छन्। यो जोडीका चार सन्तान छन्। करिब पच्चिस वर्ष पहिले स्थापना भएको अमेजन कम्पनी विश्वकै सवैभन्दा मूल्यवान कम्पनी बन्न सफल भएको छ।

अमेजनका संस्थापक जेफ बेजोसको सम्पत्ति एक खर्ब ३५ अर्ब पुगेको र अहिलेको अवस्थामा अब विश्वका सबैभन्दा धनी व्यक्ति बेजोस बनेका अमेरिकी सफ्टवेयर कम्पनी ब्लुमवर्ग अर्बपति सूचकाङ्कले सोमबार मात्रै देखाएको थियो। उनले माइक्रोसफ्टका विल गेट्सलाई सन् २०१७ मा पछि पार्न सफल भएका थिए ।

अमेजनले पहिलो पटक सोमबार सबैभन्दा उच्चस्थान ओगट्न सफल भएको थियो।

प्रतिक्रिया दिनुहोस्